Павлодарда «Тұлпар мініп, Ту алған!» конкурсының бес жеңімпазы марапатталды
«Ер Едіге» эпосын жатқа айтатын үздіктер өңір бойынша қатысқан 1,5 мың оқушының ішінен іріктеліп алынды. Конкурс жеңімпаздарын Павлодар облысының әкімі Әбілқайыр Сқақов марапаттады.
«Тұлпар мініп, Ту алған!» конкурсы Тәуелсіздіктің 30-жылдығына орай бүкіл ел бойынша жарияланды. Оның бастамашылары «Nur Otan» партиясы, Білім және ғылым министрлігі мен «Qazaq Epos» қоғамдық қоры. Павлодар облысында мәнерлеп оқушылардың сайысына 6-10 сынып аралығында білім алатын 1,5 мың оқушы қатысты.
- Ел тарихын білетін, бағалайтын және мақтан ететін халықтың болашағы зор болады, - деді Әбілқайыр Сқақов конкурстың өңірлік кезеңінің қатысушыларына. – Халқымыздың тарихы мен мәдени қазынасын сақтау мен дамытуда, халық поэзиясын, қазақ тілі мен әдебиетін шын ниетпен түсінетін сіздер секілді алтын ұрпақтың бар болуы – ертеңгі болашағымыздың ашықтығы деп сенемін. Сіздерге және жақындарыңызға мықты денсаулық тілеймін. Шабыт, жаңа шығармашылық табыстар болып, жарқын бастамалар ұзағынан болсын.
Байқаудың үшінші орын дипломдары мен 200 мың теңгенің сертификаттарц Аққулы ауданындағы С. Сатыбалдин атындағы мектептің жетінші сынып оқушысы Бекарыс Нұрбекұлы мен Абай атындағы дарынды балаларға арналған гимназияның алтыншы сынып оқушысы Мансұр Сағидоллаға бұйырды. Екінші орын мен 300 мың теңгенің сертификаттары Қызылжар орта мектебінің 7 сынып оқушысы Нұрдана Маратқызы мен Екібастұздың ауылдық аймағының Атығай жалпы орта білім беру мектебінің 9 сынып оқушысы Аяулым Амангелдіқызына берілді. Бірінші орынды жеңіп алған Екібастұз қаласының Торайғыров атындағы №22 гимназиясының 10 сынып оқушысы Алтынбек Айша-бибіге 750 мың теңгенің сертификаты берілді. Ол республикалық кезеңде Павлодар облысының намысын қорғайды.
Жеңімпаздарды сайысқа дайындаған педагогтарға да сыйақылар берілді. Әбілқайыр Сқақов оларға жас ұрпақты тәрбиелеуге қосқан үлестері үшін алғыс айтып, мұндай сайыстар өңіріміз үшін дәстүрге айналатынына үміт білдірді.
Павлодар облысы әкімінің баспасөз қызметі
Суреттерді түсірген Валерий Бугаев