“Тұлпар мініп, ту алған!” байқауы Нұр-Сұлтан қаласында басталды
Қазақстан Республикасы Тәуелсіздігінің 30 жылдығына орай «Nur Otan» партиясы ҚР Білім және ғылым министрлігі және «Qazaq Epos» қоғамдық қорымен бірлесе отырып «Тұлпар мініп, ту алған!» байқауын жариялайды.
Осыған орай «Nur Otan» партиясының Нұр-Сұлтан қаласындағы ғимаратында арнайы баспасөз-конференциясы өтті.
Баспасөз-конференциясына “Nur Otan” партиясының Нұр-Сұлтан қалалық филиалы төрағасының орынбасары Еркеғали Алимкулов, Нұр-Сұлтан қаласы әкімдігінің “Астана Дарыны” дарындылықты дамыту және психологиялық сүйемелдеу орталығының директоры Ғаждембек Тұрсынов және “Тұлпар мініп, ту алған” республикалық байқауының жетекшісі Арман Абдоллаев қатысты.
Байқау 6-10 сынып оқушылары арасында «Едіге батыр» жырын жатқа айтудан өтеді. Қатысушылар қосымша Алтын Орда мемлекетінің тарихи оқиғаларына қатысты сұрақтарға жауап беріп, жырда кездесетін көнерген сөздердің мән-мағынасын түсіндіріп, қазақ әдебиеті пәнінің оқу бағдарламасы негізінде әзірленген сұрақтарға жауап беруі тиіс.
Байқаудың аудандық кезеңі 2021 жылдың 11-12 қараша аралығында, қалалық кезеңі 16 қараша күні өтеді.
Жеңімпаз оқушылар ақшалай сыйлықтармен марапатталады.
Аудандық кезеңде:
1-орын – 150 мың теңге;
2-орын – 100 мың теңге;
3-орын – 50 мың теңге.
Облыстық (қалалық) кезеңде:
1-ші орын – 750 000 теңге;
2-ші орын – 350 000 теңге;
3-ші орын – 200 000 теңге.
Облыстық (қалалық) деңгейдегі жеңімпаз оқушылардың мұғалімдеріне арналған ақшалай сыйлықтар:
1-ші орын – 1 500 000 теңге;
2-ші орын – 700 000 теңге;
3-ші орын – 400 000 теңге.
Байқау туралы толық ақпаратпен www.qazaqepos.com сайтында танысуға болады. Қосымша жаңалықтар мен мәліметтерді «Nur Otan» партиясы филиалдарының әлеуметтік желілердегі ресми парақшаларынан таба аласыздар.
Еске сала кетейік, «Тұлпар мініп, ту алған!» байқауы Елбасы Н.Ә. Назарбаевтың «Болашаққа бағдар: рухани жаңғыру» мақаласындағы міндеттерді іске асыру мақсатын көздейді. Байқау 2018 жылдан бері «Алпамыс батыр», «Қобыланды батыр» жырларын жатқа айту бойынша 5 мың мектептен 50 мыңнан астам оқушы мен 25 мыңнан астам ұстаздарды қамтыды. Байқау дәстүрлі түрде алдағы жылдары өз жалғасын таппақ.