«Nur Otan» партиясының Ақтөбе облыстық филиалы төрағасының орынбасары Бағжан Тлегенов, «Ақтөбе – Дарын» өңірлік ғылыми-тәжірибелік орталығының директоры Нұрбол Бекбағанбетов және «Тұлпар мініп, ту алған!» байқауының жетекшісі Арман Абдоллаев іс-шараның шартымен таныстырды.
Байқау 6-10 сынып оқушылары арасында «Едіге батыр» жырын жатқа айтудан өтеді. Қатысушылар қосымша Алтын Орда мемлекетінің тарихи оқиғаларына қатысты сұрақтарға жауап беріп, жырда кездесетін көнерген сөздердің мән-мағынасын түсіндіріп, қазақ әдебиеті пәнінің оқу бағдарламасы негізінде әзірленген сұрақтарға жауап беруі тиіс.
– Бұл шара Қазақстан Республикасының Тұңғыш Президенті – Елбасы, Н.Ә.Назарбаевтың «Болашаққа бағдар: Рухани жаңғыру» мақаласында айқындалған міндеттерді және «Nur Otan» партиясының Сайлауалды бағдарламасының «Парасатты және зияткер қоғам» бағытын іске асыру мақсатында ұйымдастырылды. Қазақ халқының тарихи-мәдени қазынасын сақтап, өскелең ұрпақты қазақ халқының рухани асыл мұрасын, халық поэзиясын, қазақ тілі және қазақ әдебиетін зерделеуге ынталандыруда маңызы зор, – деп атап өтті партияның Ақтөбе облыстық филиалы төрағасының орынбасары Бағжан Тлегенов.
Байқау 2021 жылдың 25 қыркүйек – 5 қараша аралығында өтеді. Әр кезеңнің жеңімпаздары ақшалай сыйлықтармен марапатталады. Облыстық кезеңнің жүлдегеріне 750 000 теңге тағайындалған. Оза шауып, бәйге алған оқушылардың ұстаздарының да еңбегі ескерілді. Оларға қаржылай қолдау білдіріледі.
Айта кетейік, байқау туралы толық ақпаратпен www.qazaqepos.com сайтынан танысуға болады. Қосымша жаңалықтар мен мәліметтерді «Nur Otan» партиясы филиалдарының әлеуметтік желілердегі ресми парақшаларынан таба аласыздар.